КӨН АЯТЕ

«{Исламча яшәп} Сабыр иткәнегез өчен сәлам сезгә! Ахыргы йортыгыз {булган Җәннәт} нинди күркәм!». ("Рәгыд«сүрәсе, 24 аять).

КӨН ХӘДИСЕ

Пәйгамбәребез Мөхәммәд салләллаһү гәләйһи үә сәлләм әйтте:

«Һәрнәрсәнең чистартучы зәкәте бар, сәламәт тәннең зәкәте ул — ураза». (Ибне Мәҗҗә, әл-Бәйхакый).

АҢЛАТМА:

Әгәр Аллаһы Тәгалә матди байлыкка ирешергә мөмкинлек бирде икән, мөселман шөкер итү йөзеннән һәм малын пакьләү максатыннан шул байлыкның 40/1 өлешен мохтаҗларга тапшырырга тиеш. Әгәр Аллаһы Тәгалә төзек акыл биргән икән, кеше намаз укырга тиеш. Әгәр Аллаһы Тәгалә тән саулыгы белән бүләкләсә, кеше ураза тотарга тиеш. Димәк: малның-акчаның зәкәте — кырыктан бер өлеше; акылның зәкәте — намаз; сәламәтлекнең зәкәте — ураза).

СОРАУ:

Рамазан аенда никах укытырга ярыймы?

ҖАВАП:

Шәригатьтә «Рамазан аенда никахлашырга ярамый» дигән тыю юк, шуңа күрә бу сорауга уңай җавап кына биреп була: әйе, ярый. Әмма никах чарасы бу айның үзенчәлеген исәпкә алып үткәрелергә тиеш:

• имам катнашындагы никах мәрәсимен көндез үткәрергә рөхсәт булса, табын мәҗлесен кояш баеганнан соң гына үткәрергә ярый;
• табын мәҗлесе авыз ачканнан соң, ягъни кичке вакытта үткәрелсә дә, Рамазан аена хөрмәт йөзеннән аны тыйнаграк, артык шауламыйча үткәрү киңәш ителә;
• никах укылганнан соң, ир белән хатын көндезләрен уразада булырга, ягъни ашау-эчүдән һәм якынлык кылудан тыелып торырга тиеш (кояш баеганнан соң таң атканчыга, ягъни «сәхәр тәмам» дигән вакытка кадәр чикләүләр бетерелә);
• шушы шартларны үтәү кыен булса яки никах мәҗлесен һәм туйны тамада белән, күңел ачып үткәрәсе килсә, никахны Рамазан аеннан соңгарак вакытка билгеләү хәерлерәк булыр.

Ришат хәзрәт Курамшин әзерләде