«Гадел Россия» партиясе лидеры, Дума фракциясе башлыгы Сергей Миронов пенсионерның яшәү минимумы урынына минималь хезмәт хакы күләме нигезендә пенсионерларны матди тәэмин итүнең минималь дәрәҗәсен билгеләргә тәкъдим итте, дип яза «РИА Новости» агентлыгына сылтама белән «Татар-информ». Әлеге мәсьәлә буенча закон проекты парламент палатасы каравына бүген тапшырылды.
Проектка аңлатма язуында пенсионерның яшәү минимумының төбәк күрсәткечен бөтен ил өчен бердәм булган хезмәткә түләүнең минималь күләме федераль күрсәткеченә алыштырырга тәкъдим ителә. Хәзер эшләмәүче пенсионерларга бюджеттан төбәктә билгеләнгән яшәү минимумы дәрәҗәсенә кадәр өстәп түлиләр. 2026 елның 1 гыйнварыннан пенсионерлар өчен федераль яшәү минимумы аена 16 288 сум тәшкил итә.
Төбәктә яшәү минимумы гомумроссиянекеннән югарырак, ә пенсионерның керемнәре төбәк минимумыннан түбәнрәк булса, региональ өстәмә түләү билгеләнә. Проект документларында билгеләп үтелгәнчә, закон проекты социаль гаделлек принципларын ныгытуга юнәлдерелгән.
Миронов агентлыкка аңлатканча, әгәр пенсионер 15 мең сум ала икән, ә яшәү минимумы18 мең сум булса, Социаль фонд 3 мең сум күләмендә өстәмә түләү билгели. Проектта төбәк яшәү минимумы урынына 27 мең сум күләмендәге бердәм федераль минималь хезмәт хакыннан файдаланырга тәкъдим ителә.
Сүз уңаеннан, хәзерге вакытта Татарстанда «Нәтиҗәле конкурентлыкка сәләтле икътисад» илкүләм проекты гамәлгә ашырыла.